Inauguraziun 2003

Ai 31 de agost, apëna n mëis dô che i laûrs de realisaziun él ste l’ inauguraziun y benedisciun dla plaza dal palè nöia de erba sintetica tla zona dl sport Plans.

En chësta ocajiun él rové adalerch les autoritês politiches provinziales y locales plü altes sciöche ince autoritês y funzionars fora dl ambiënt sportîf de nosta provinzia y valada. Al é ince rové adalerch tröpa jënt da La Val che por gauja dl bur tëmp da danmisdé n'é nia piada ia sö por munt y á insciö tut l'ocajiun por tó pert ala festa y por conscidré plü daimprò la plaza nöia. Le fat che la plaza dal palé á tl tëmp de püces edemes ciafè n bel guant vërt, deperpo ch'an ê ausá dala odëi trés cun le corú ross-cöce, ti á sambëgn fat demorvöia a tröc. La jënt rovada adalerch á sambëgn podü jí íte söl bel tepih morjel che ê assuié sö a tëmp de record dô la plöia abondanta dla nöt y de düt le danmisdé. La festa á bele metü man danmisdé cun na partida dl palè di "Altherren" danter la scuadra da La Val, metüda sö por le prüm iade chësc ann, y la scuadra esperta di "Barantli" dl'Alta Badia, che á ince davagné le match. Chësta partida é gnüda sogada por düta süa durada sot la plöia cun i sogadus che n'á imbazilé nia da soghé. La plöia ne orô propi nia lascé dô y canche ince damisdé ne lasciâl nia, parôl propi che la manifestaziun manaciass da tomè t'ega. Mo porfortüna dô la üna âl lascè bel plan da plovëi y tl tëmp de mes'ora él gnü fora bel sorëdl, a na maníera ch'an á podü jí inant cun le program sciöche preodü. Dales döes él gnü fat na defilada cun ingrès söla plaza nöia, cun danfora la musiga da La Val, seguida dai sogadus y funzionars dl'Uniun dl Sport y dai ghesc d'onur rová adalerch. La plaza nöia s'á presentè te so guant nü bel vërt y infornida sö da festa sciöche al alda te chëstes ocajiuns.

Al é spo sté le vizepresidënt dl'Uniun Sport La Val, Pio Ploner ch'á tut la parora saludan dütes les autritês y la jënt ch'á tut pert ala festa y á condüt inant le program, invian i ghesc a tó la parora.

Imprüma él stè l'ombolt da La Val, Franz Complojer ch'á tut la parora y á splighé porciudí che le Comun á daidé finanzié chësta infrastrutüra, che por valgügn podess gní aratada sciöche n caprize, assiguran che da pert dl Comun ne vëgnel porchël nia lascè indô d'atri laûrs.

Al é spo stè le presidënt dl'Uniun dl Sport, Sepl Comploi ch'á portè dant sò discurs, manifestan la gran ligrëza dla Uniun da podëi inauguré chësta bela infrastrutüra. Al á spo cuntè sö in cürt sciöche ara é jüda da passè dala vedla plaza de saurun ala plaza nöia, ti dijon te chësta ocajiun giulan al mëmber dl comité Thomas Deiaco, che s'á daimprüma insö dé jö cun chësta idea y é ince sté porsona de contat danter l'Uniun y la firma Eybl Sportbau che é gnüda a mëte jö le tepih. Le presidënt á ince spo motivé la nezescité da realisé chësta infrastrutüra cuntan sö i vantaji ch'ara á y portan dant che la plaza vëgn anuzada da plü de 70 sogadus che s'abina dui o trëi iadi al'edema por i alenamënc y les partides. Al á spo portè dan le costimënt dl'opera y sciöche ara é gnüda finanziada, ringrazian particolarmënter le Presidënt dla Junta Provinziala, l'Ombolt y la Cassa Raiffeisen dla Val Badia por i contribuc conzedüs. Ringrazié âl ince spo i tröc mëmbri dla Uniun ch'á daidé laurè por la realisaziun dla plaza nöia, olache al é gnü fat passa 300 ores de laûr volontar. Parores de ringraziamënt ti él ince jü a düc chi che s'á dè da fá por vëne zetules dla lotteria, metüda a jí aposta por daidé curí na picera pert la spëisa, y a chi ch'á cumprè zetules y metü a disposiziun pesc. Giulan ti él inultima ince gnü dit al Arch. Stefo Nagler ch'á surantut sciöche mëmber dla Uniun la proietaziun y direziun di laurs y sambëgn ai mëmbri dl comité dla Uniun ch'á albü n gran laur y tröpes bries por portè inant chësta opera.

Dopo él spo stè le rapresentant dla F.I.G.C. da Balsan Otto Crepaz y le rapresentant dl VSS Ubi Valentini ch'á portè dant sües parores de salüt. Al é spo gnü inant les döes maius autoritês politiches presëntes en chësc dé, imprüma l'Assessur Provinzial Florian Mussner. Vël á portè dant l'importanza de chësta infrastrutüra, dantadüt por i jogn y i mituns che pò ciafè chilò n passatëmp sann.

Al é spo stè le ghest d'onur plü aspetè ch'á dut la parora, le presidënt dla Junta Provinziala Luis Durnwalder. Vël á giustifiché la realisaziun y le finanziamënt de chësta plaza sintetica cun sò prîsc bindebò alt, cun la nezescité da ti jí dô al progrès mo dantadüt cun le fat che la zona sportiva Plans é te na situaziun climatica dër desvantajosa por fá crësce erba naturala. Al á dit che mâ te te' posc olache ara ne vá nia da tigní na plaza de erba naturala gnarâl finanzié plazes sintetiches. Le maiú aplaus s'á ciafè le Presidënt Durnwalder canche al á impormetü de surantó a ciaria dla Provinzia la spëisa nia ciamò curida por le finanziamënt dl'opera. Inultima ti al ciamò metü a cör ai funzionars dla uniun da ciarè de mantigní indortüra ti agn che vëgn chësta infrastrutüra tan bela y moderna.

La parora ti é spo güda passada a siur Ploan Iaco Ploner che á perié jö la benedisciun dal Cîl sura la plaza dal palè nöia y sura düc chi che l'anuzëia.

Le program dla festa é spo jü inant cun le buffet sponsorisé dala firma Eybl Sportbau y acumpagné dal bel sonè dla Musiga che ti á dè na atmosfera dër da festa a düta la manifestaziun. Dartan le buffet él stè i ghesc che s'á mosoré pro les trates dai ünescmetri, olache un o l'ater á lascè odëi sües capazitês dai tëmps passá tl jüch dl palè. Le Presidënt Durnwalder á desmostrè de avëi n gran "dërt" y l'Assessur Mussner á metü en mostra süa abilité sciöche portíer. Dô le buffet é la festa spo jüda inant cun na partida danter la scuadra da La Val cuntra na seleziun de sogadus dla Val Badia, olache la formaziun de ciasa á albü la miú. Le dé é spo gnü stlüt jö dô les sies cun l'estraziun di bí pesc dla lotteria (ciara cheder a pert).

Ciamo valgünes foto dla bela festa.

La plaza dal palè Plans:

La plaza dal palè tla zona sportiva Plans é gnüda realisada dan da 10 agn sciöche plaza de saurun. La plaza ê ti ultims agn te condiziuns dër stletes y al ess messè gní baratè fora le saurun y implü essel messü gní fat danü na pert dl implant da bagné che ne funzionâ nia indortüra, cî che ess costé indüt ca. 150.000,00 euro. A na te' plaza de saurun ti vëgnel dè na durada mesana de 6-7 agn, dô da chi ch'al mëss indô gní baratè fora le saurun. Le tepih sintetich "Top Soccer" che vëgn venü dala firma Eybl Sportbau da Wels (Austria) y che é gnü metü jö söla plaza dl palè a La Val á na garanzia totala de 8 agn y al dess avëi na durada de 15 fina 20 agn. Le cost total dla infrastrutüra realisada tla zona dl sport Plans röia söles 300.000,00 euro, mo sc'an confrontëia le cost y la durada dles döes plazes spo vëigon che ala fin di cunc ne costa la plaza sintetica nia deplü. Implü se sparagnun ciamò l'implant da bagné y i cosc de manutenziun y ince valgamia basc. Le tepih "Top Soccer" é metü adüm da fîs d'erba cun na lunghëza de ca. 5,5 cm. Söl tepih vëgnel metü ca. 1 cm de saurun al cuarz y spo lassura ciamò ca. 3 cm de graní de gume che fej le funz bel morjel. Les linees dla plaza é gnüdes taiades fòra y inculades íte cun n tepih dal corú blanch. La realisaziun dla plaza nöia é gnüda finanziada in gran pert cun contribuc publics: la maiú sona é gnüda conzedüda dala Provinzia cun indüt 150.000,00 euro. Le comun á contribuí cun n contribut de 90.000,00 euro. Na bela soma é ince gnüda metüda a disposiziun dala Cassa Raiffeisen dla Val Badia, plü avisa 10.000,00 euro.

Pur udei les foto dla realisaziun dl campo clicca. FOTO

Pur udei les foto dl campo nü clicca. FOTO