2ª partida de campionat - Val Badia

Tl rode C de terza categoria él te chësta sajun bëgn trëi scuadres ladines che se fej concorënza, do che le Mareo á metü sö na secunda scuadra che tol pert a chësc campionat.

Insciö pó i ladins se afronté bëgn dui iadi d’altonn y l’ultim fin dl’edema era tocada al La Val cuntra la formaziun dl Acd Val Badia. Soghé él gnü a La Val mo por i padruns de ciasa ne ara nia buté, chisc é gnüs castigá ti ultims menüc cun en gol de Graffonara.

Les formaziuns se stüdia jö ti prüms menüc de jüch, impormó al 10^ röia na crossada dl La Val amez por Philip che controlëia a dovëi le curan mo tira mal y sura porta fora. Le medemo se delibrëia püch do sön le ciantun de area y fej pié i a na trata a giré cuntra l’incrujiada de porta aversara, le portier René é asvelt y archita sö le palé. Le nervosism se fej sintí tles giames di sogadus, tröc é i palés soga mal, massa cörc o massa lunc y insciö gareta ince ma püces ocajiuns da gol.

Do la palsa se müda le ritm y les formaziuns ó sbloché le resultat. Al 60^ crossëia Alex. M. da La Val amez por Franz che rebat de ce a püc metri le palé cuntra porta: le portier René é a dert post por desfanté le curan al’ultim mumënt cun na gran parada. Ince la Val Badia costruësc val aziun mo che ne é plö d’intant nia prigoroses. Impormó al 78^ davagna i aversars na puniziun dai 25 metri: la crossada röia amez area daulache le palé rebatü dala defenjiun vëgn anuzé a dovëi da Graffonara che tira sëch dlungia le pé de porta ite. Le resultat é insciö sbloché y a vantaje dla Val Badia.

I padruns de ciasa pro da se alzé y röia da na pert ite te area a tra, le portier é bun de paré la trata mo le curan ti sciampa cürt fora dles mans; tl mumënt che al pro de se tigní danü le palé röia en sogadú da La Val amesa ite y vëgn tigní tles giames tuman a tera. Sot i scrai dl publich y di sogadús de ciasa fej l’arbiter cun convinziun jí inant le jüch: al ne é nia en fal da önescmetri dijel. Ti ultims menüc cialc dla partida ne garetel nia tröp y i aversars dla Val Badia pó trá le scrai de ligrëza y se mët ia i trëi punc te gaiofa.

La Val - Val Badia  0-1

Formaziun La Val: 1. Sepl Kantioler, 2. Simon Campei, 3. Max Nagler, 4. Martin Menazzi Marcelo, 5. Paolo Vallazza, 6. Christian Terza, 7. Philip Moling, 8. Stefan Sottara - capitan, 9. Alex Miribung, 10. Franz Tolpeit, 11. Felix Nagler

Formaziun Val Badia: 1. Renè Ferdigg, 2. Florian Barbolini (dal 68^ Alexander Ploner), 3. Matteo Ploner, 4. Armin Plazza, 5. Max Videsott, 6. Simon Graffonara, 7. Luca Pizzinini, 8. Fabian Clara, 9. David Pizzinini, 10. Joel Unterweger, 11. Marc Mayr

Alenadù La Val: Klaus Gräber

Alenadù Val Badia: Hanspeter Graffonara

Proscima partida: La Val süga duman sabeda dales 16:00 a Wiesen cuntra la scuadra de ciasa. La Val Badia süga deperpo le medemo de te ciasa dales 15:30 cuntra le Sterzing.

Atri resultac:

Altherren (La Val) = Milland – La Val  1-1

U-15 (La Val - Mareo) = La Val – Team 4  2-3

Giovanissimi (Mareo/La Val) = Mareo - Gitschberg  0-10

U-12 (La Val) = Obopuschtra Tiger – La Val  3-3

U-11 (La Val) = Olang – La Val  0-1