3ª partida de campionat - Wiesen
Sön só trú incunta Le La Val la scuadra da Wiesen, che met se mët i trëi punc te gaiofa cun bëgn cater goi.
La scuadra da Wiesen é tomada jö de categoria l’ann denant. Por La Val en nü aversar, conesciü y batü dan valgügn agn. La formaziun é daldöt nöia y sön le gran ciamp dl Sterzing ara mostré de ester superiura a chëra ladina.
Bele ti prüms menüc manacia le La Val de se ciafé le gol. Sön na dijatenziun dla defenjiun ti sciampa l’atacant y röia sú cuntra le portier, chiló é Giovanni reatif a deloj le curan te ciantun.
Le Sterzing fej gran druch, daidé ince dal gran vënt che sofla, cuntra i sogadus ladins y röia spo al ventejim menüt al vantaje: le medemo atacant da denant röia da na pert ite y vëgn contrasté dal defensur che gaujëia insciö en önescmetri. Chësc se presentëia ince ala trata y la trasformëia.
Le jüch ladin stënta a pié ia, intres vëgnel tigní sö dai aversars, plö asvelc da interzeté i palés. Insciö ti garetera ince da arlungé le vantaje cun atri dui goi. Al 37^ y le sogadú a meciamp che crossëia alt amez, le portier ladin pro de desfanté la trata mo vëgn ingiané dal vënt che ti fej perd le curan fora dles mans y le fej coguré te süa porta. Le terzo gol toma al 42^ prësc anfat co le prüm, l’atacant röia te area y vëgn indo tigní sö dala defenjiun, ince chiló mostra l’arbiter sön le punt dla mascima puniziun. Cun la bela trata concretisëia Pfitscher le önescmetri.
Tla secunda pert röia te ciamp le La Val cun en atra determinaziun y ti pröms vint menüc comana i ladins. La formaziun é bun posizionada y pressëia a dovëi la defenjiun. Al 55^ crossëia Franz amez por Alexander che apogëia te porta: al é indere le mandl fosch che dij de no al gol por na posiziun de forajüch, daldöt nia iustificada. Plö trates röia ciamó cuntra porta aversara mo indî nia prigoroses por le portier.
Al 80^ ti sciampa dal atra pert le atacant ala defenjiun y se fej inant sú cuntra porta, Stefan pro da abiné ciamó le palé mo contrastëia le sogadú. Le mandl fosch ti mostra atira la cherta cöcena y le desgorda insciö dal ciamp da jüch. Le ultimo gol toma ciamó al’ultim menüt de jüch sön aziun cun trata bassa dlungia le pé lunch de porta.
Wiesen - La Val 4-0
Formaziun La Val: 1. Giovanni Erlacher, 2. Marco Miribung, 3. Natan Colletta (dal 55^ Alexander Complojer), 4. Martin Menazzi Marcelo, 5. Paolo Vallazza, 6. Christian Terza, 7. Felix Nagler, 8. Stefan Sottara - capitan, 9. Philip Moling (dal 75^ Di Lorenzo Meo Maximilian), 10. Franz Tolpeit, 11. Michele Campei
Alenadù La Val: Klaus Gräber
Proscima partida: La Val süga duman sabeda dales 15:30 a La Val cuntra la scuadra da Falzes.
Atri resultac:
Altherren (La Val) = La Val – Dietenheim 2-1
U-15 (La Val - Mareo) = Ridnauntal – La Val 4-6
Giovanissimi (Mareo/La Val) = Latzfons - Mareo 4-2
U-12 (La Val) = La Val – Pro Team 1-0
U-11 (La Val) = San Laurënz – La Val 1-2
