6ª partida de campionat - Derby de Rit
Na partida sintida da tramesdöes les formaziuns, olache i padruns de ciasa röia al dopl vantaje bel tl prüm tëmp y dej só insciö le derby tra vijins.
Do cinch agn unse indo podü s’encoforté al derby de Rit, anter la formaziun da La Val y chëra dl Mareo. Na partida che á fat incunté sciöche aversars valgügn vedli cumpagns de scuadra y ê insciö particolarmënter sintida.
En bel publich rové adalerch a La Val y de bunes temperatöres é i ingrediënc otimai por en derby tra vijins.
A pié ia cun plö druch é la formaziun dl Mareo, cun determinaziun röi denant sön vigni palé y manacia al 10^ de desgropé le resultat cun na gran trata de Alan E., che rebat indere cuntra l’incrujiada de porta. I padruns de ciasa mëss se descedé y insciö feji ince. Al 20^ é Franz T. dl La Val che anuzëia na trata dal ciantun por rebat de ce te porta aversara, chilé é le portier Daverda al dërt post por desfanté le curan. Franz ó se refá y al 25^ sön la proscima trata dal ciantun röiel indo a rebat sëch te porta por le 1 a 0. Le medemo radoplëia ciamó le resultat al 36^: sön na passaja de ce röiel te area y pro da tra de ciamp bass dlungia le pe de porta ite. Le La Val se ciafa indo y se posizionëia a dovëi te ciamp, le sciür dl’arbiter por la fin dl pröm tëmp ti archita indere le bun momënt.
Sciöche le mëteman dla partida scomenciëia ince la secunda pert, al é indo le Mareo che atachëia y manacia de ruvé al prüm gol cun na trata massa alta de Kevin K. sön la rebatüda dla defenjiun. Ince valgünes aziuns di Maroi ti proscimi diesc menüc fej tromoré le publich de ciasa, mo impó ne ti garetl nia da segné.
Dal’atra pert él spo la formaziun de Gräber che se fej odëi, al 65^ ti sciampa Michele ala defenjiun mo abina mal le curan, che röia sura porta fora. Al 75^ spo la ocajiun por mët al sigü le resultat: Franz vëgn contrasté te area aversara y l’arbiter mostra sënza dubité sön le punt dla mascima puniziun. La trata de Michele C. vëgn indere tignida sö dal’un dl Mareo Daverda. La partida va inant y a purvé le gol é ciamó Felix, che abina en palé alt sú dan porta mo la rebat indere de ce püch sura fora. Le Mareo pro cun dütes sües ermes de avalié le resultat, valgünes crossades amez é dassënn prigoroses olache al é indere i defensurs da La Val che röia denant sön le palé por le tra demez. Do cater menüc de recuper sciüra l’arbiter la fin dla partida. En bel derby emozionant y da zangané, sciöche al ó ince ester. Do la partida s’á i sogadús incunté sön terassa a sla ciacolé pro en bun toch de turta sciöche da tradiziun.
La Val – Mareo B 2-0
Formaziun La Val: 1. Giovanni Erlacher, 2. Simon Campei, 3. Max Nagler, 4. Martin Menazzi Marcelo, 5. Paolo Vallazza, 6. Christian Terza - capitan, 7. Philip Moling, 8. Stefan Sottara (dal 76^ Zanoguera Bruno), 9. Alex Miribung (dal 85^ Martin Ploner), 10. Franz Tolpeit, 11. Michele Campei
Formaziun Mareo: 1. Alex Daverda, 2. Stefan Rungger, 3. Alan Ellecosta (dal 46^ Fidelis Ploner), 4. Simon Comploi, 5. Kevin Kastlunger, 6. Radames Dal Molin (dal 60^ Manuel Ties), 7. Patrick Rubatscher, 8. Thomas Castlunger - capitan, 9. Alex Rubatscher (dal 46^ Moritz Talmonn), 10. David Willeit, 11. André Ties (dal 60^ Moritz Videsott)
Alenadù La Val: Klaus Gräber
Alenadù Val Badia: Albert Castlunger y Patrick Costabiei
Proscima partida: La Val süga duman sabeda dales 15:30 te ciasa cuntra le Sterzing. Le Mareo süga deperpo le medemo de te ciasa dales 17:00 cuntra la Val Badia.
Atri resultac:
Altherren (La Val) = Albeins – La Val 2-0
U-15 (La Val - Mareo) = Milland Grau – La Val 2-3
Giovanissimi (Mareo/La Val) = Mareo – San Laurënz 0-5
U-12 (La Val) = La Val – Taufers 1-3
U-11 (La Val) = La Val – Alta Badia 0-3
