1ª partida de campionat - Uttenheim
La Val perd la pröma partida de retüda sot a burt tëmp cuntra en aversar sterch.
Tarlís, plöia, nëi, granijures y n gran vënt é stá i protragonisc de chësta prüma partida de retüda dl rode C de terza categoria. I ladins se dlacia pró tla secunda pert dla partida daulache le Uttenheim castighëia a dovëi portan a ciasa na devënta cun resultat pesoch.
Sot a na plöia lisiera scomëncia la partida cun le Uttenheim che pressëia alc cuntra la defenjiun de ciasa. Le verdaporta Giovanni mëss plö iadi se destrá por defënn le resultat. Ala cherd’ora ti sciampa l’atacant al defensur ladin y röia cuntra le un dl La Val, che pro de antizipé le sogadú mo röia fora tëmp y le corëta sot y sura. L’arbiter cun la cherta ghela tla man mostra sön le punt di önescmetri, olache le sterch Schwärzer traformëia la trata cun segurté tl vantaje aversar. Püch do davagna le La Val na trata dal ciantun de area aversara: Michele indirizëia bun cuntra le pé de porta, le curan ti sciampa ince sot les giames dl portier fora mo passa ia la linea de porta por jí spo fora de ciamp.
Le tëmp vëgn tres plö burt y al mët man da granijuré, amez le ciamp vëgnel batalié sön vigne palé por costruí val ocajiun da gol, al é indere i aversars che á scialdí la miú sön la formaziun de ciasa y röia plö gunot a tra de porta. Por fortüna é gonot la prezijiun debla y insciö ne esi nia plö d’intan prigorusc.
La secunda pert mët man spo sot ala nëi y n gran vënt. Bele ti prüms menüc röia Felix da na pert jö y crossëia bass amez por Alexander che röia por en pulan massa tert sön le palé. Tramres les formaziuns se stënta dassënn a tigní le palé sot a control y tra na svirgolada y l’atra sozedel che al salta fora n’ocajiun da gol sciöche al 58^, canche l’aversar ciumpëda te area y è ciamó bun de passé amez por le cumpagn sú dan porta che á ma plö bria de apogé te rëi. Al 79^ y 84^ aumentëia ciamó le vantaje le Uttenheim, trami iadi ti sciampa i atacant ala defenjiun y röia susc cuntra Giovanni a tra te porta. Sot a burt tëmp y dlaciá pro fej l’arbiter ruvé la partida, i sogadús pó jí sot na duscia frëida, chi da Uttenheim cuntënc y chi da La Val che da La Val che mëss atira desmentié chësta partida y chirí nöies forzes por le derby che ti aspeta do Pasca.
La Val – Uttenheim 0-4
Formaziun La Val: 1. Giovanni Erlacher, 2. Natan Colletta (dal 60^ Menazzi Martin Marcelo), 3. Michele Campei, 4. Max Nagler, 5. Paolo Vallazza, 6. Christian Terza – capitan, 7. Felix Nagler, 8. Stefan Sottara, 9. Franz Tolpeit, 10. Philip Moling (dal 75^ Egon Frenes), 11. Alexander Complojer (dal 75^ Di Lorenzo Maximilian)
Proscima partida: La Val palsa le fin dl’edema de Pasca y süga indo proscima sabeda dales 16:00 a La Ila cuntra le ACD Val Badia
Atri resultac:
U-15 (La Val/Mareo) Team4 - La Val 5-2
