4ª partida de campionat - Falzes

En punt iüst da se partí do na partida rica de ocajiuns.

Le La Val incunta le Falzes tl cuarto fin dl’edema de campionat d’aisciüda. I ghesc ladins s’á tres stenté sön le ciamp dl Falzes mo chësc iade esi stá bun de tigní bot y porté a ciasa en bel punt.

I prüms trënta menüc resta indere i ghesc cun le ce te cabina, le Falzes dominëia la prüma pert ruvan plö iadi dan porta. Al 19^ davagna le Falzes na trata dai önescmetri sön en fal dla defenjiun. L’atacant ala trata abina mal le palé che röia de tröp sura porta fora. Le druch dl Falzes ne lascia nia do y al 25^ pro le sogadú a mezciamp en palonët dal piz de area, Giovanni mëss bindebo se destrá a desfanté la trata te ciantun. Bel plan se descëda ince i ladins cun val trata nia dl düt prigorosa dal limit de area.

An mëss aspeté le 44^ por desgropé le resultat: Michele sciampa da na pert jö y vëgn sorví alt da Philip, al crossëia bass amez olache Felix röia a dert post por apogé le palé te rëi. Püch do sciüra l’arbiter la fin dl pröm tëmp.

Tla secunda pert röia le La Val cun en ater spirit te ciamp. Atira manaci de arlungé le vantaje cun Franz, al röia da na pert jö bel sú cuntra porta, la trata ti röia indere ados al portier. Dedo al 65^       ti sciampa le medemo ala defenjiun y pro en palonët che é indere massa alt y röia insciö sura porta fora. Ince le Falzes ciafa indo coraje y copiëia l’aziun dl gol dl La Val al 73^, ince só defensur ti sciampa da na pert jö y crossëia amez, olache le compagn apogëia te porta por le 1 a 1. Le nervosism da pert de tramres formaziuns se fej sintí sön le ciamp, l’arbiter mëss dassënn se porvé a ne perd nia le control dla partida. Ince la stanchëza ti ultims menüc se fej sintí y püces é les aziuns da odëi, porchel é le sciür dla fin bëgnaldí. Le punt é iüst y i sogadus se vijina indo.

Falzes – La Val 1-1

Formaziun La Val: 1. Giovanni Erlacher, 2. Simon Campei, 3. Michele Campei, 4. Christian Terza - capitan, 5. Paolo Vallazza, 6. Bruno Zanoguera, 7. Felix Nagler (dal 55^ Alexander Complojer), 8. Stefan Sottara, 9. Franz Tolpeit, 10. Philip Moling, 11. Maximilian Di Lorenzo Meo (dal 70^ Alex Miribung)

Gol por La Val: Felix Nagler al 45’

Proscima partida: Duman a La Val dales 16:00 cuntra le Pretau

Atri resultac:

U-15 (La Val-Mareo) : La Val - Milland  6-0

Giovanissimi (Mareo/La Val) : Team 4 – Mareo  8-0

U-12 (La Val) = Obopuschtra Tiger  – La Val  1-4

U-11 (La Val) = La Val – Ridnauntal  1-3