9ª partida de campionat - Perca

La Val recuperëia le svatanje dl pröm tëmp y davagna ciamó la partida ti ultims menüc.

Cun la fin de ma se röia en gran pert i campionac dl palé d’aisciüda. Insciö ince por la scuadra da La Val, che á milité te chësta ultima sajun tl rode C de terza categoria. En ann nia daldüt saurí, cun 3 devëntes, 5 per y 10 pordüdes. Impó é le grup sté compat y á batalié cina l’ultim sciüre por vigni punt, sciöche ince cuntra le Perca l’ultim fin dl’edema de campionat. Tles ultimes partides an odü na scuadra reativa, che é stada buna plö iadi a recuperé le svantaje y de osc le resultat. Tl’ultima partida, sogada le vëndres sëra a Perca, ne era nia stada atramënter.

Le Perca pëia ia cun druch y röia al gol bel ti prüms trëi menüc de jüch. Sön na trata dal ciantun röia le alt sogadú Gröber sú y a dërt post por rebat de ce te porta. Inant é la formaziun de ciasa prigorosa y manacia de radopié le vantaje, Giovanni se möi bun y evitëia che chësc pois suzed. Al 20^ se delibrëia Stefan al limit y pro na trata che sfrëia la stangia de porta y röia sura fora. Sön le ciamp uramai sot na plöia pesocia bataliëia i sogadus sön vigne palé, al é indere scialdi le Perca che á la miú, sënza trá fora indere de gran ocajiuns tl’ultima cherd’ora.

I ladins röia zeruch te ciamp do la palsa ciariá de determinaziun nöia. Cun val sostituziun se alza la formaziun y süga bel y bass le curan. Intres röia i aversars massa tert a marché y a antizipé i ladins, che ti sciampa cun velozité ala defenjiun. Al 55^ röia en palé alt amez por Alex M. che pro de forfesc y abina ince bun le palé, al é indere le portier che é reatif y ti dij de no a süa morvëia. Püch do, plö avisa al 57^ é le medemo Alex M. che pëia ia y vëgn contrasté püch it dala linea de straufunga aversara, por l’arbiter él tler: mascima puniziun por La Val. Le rigorist Michele se posizionëia bun le palé sön le punt y trasformëia sigü por le 1 a 1. La partida va inant y i menüc vëgn tres demanco, i padruns de ciasa é prigorusc sön les situaziuns dai standard, deperpo che La Val fej trumuré le panchina aversara cun sües infiltraziuns da les pertes. Insciö davagni al 85^ üna dles tantes trates dal ciantun. Michele crossëia bass amez, Paolo a dërt post y ciarié de convinziun cüra bun le palé, se oj y tira bass sön le pé de porta lunch, la cogura ciamó azicada dal portier va bel plan te rëi por le vantaje ladin. Grana la ligrëza por i sogadus che se stlüj incër Paolo y le festejëia sciöche al sla mirita.

Gran nervosité ti ultims menüc de jüch, le Perca pro cun düc i mesi a avalié le resultat dan da só publich. Cun luzidité se para i ladins y ne lascia it plö nia cina le sciür dla fin. La devënta pó insciö gní festejada y les emoziuns tl müs di sogadús se fej odëi. Val sogadú á ince soghé süa ultima partida do na sfilza de agn sugá te pröma scuadra y á podü insciö tó comié da sü cumpagns cun en beliscim record.

Insciö s’a ruvé ince chësc campionat por i sogadus che va sëgn tla palsa da d’isté a recuperé val forzes po en ater ann. I tolun l’ocajiun por rengrazié i sostenidús che é tres presënc ales partides, i sponsor y vignun de os che á fat en sorvij por nosta scuadra, giulan!

Perca – La Val  1-2

Formaziun La Val: 1. Giovanni Erlacher (dal 46^ Sepl Kantioler), 2. Egon Frenes (dal 46^ Martin Menazzi Marcelo), 3. Simon Campei (dal 60^ Natan Colletta), 4. Christian Terza - capitan, 5. Paolo Vallazza, 6. Moling Philipp (dal 65^ Bruno Zanoguera), 7. Felix Nagler, 8. Stefan Sottara, 9. Alex Miribung, 10. Michele Campei, 11. Maximilian Di Lorenzo (dal 46^ Franz Tolpeit)

Alenadú: Klaus Gräber

Goi por La Val: Michele Campei ai 57^ y Paolo Vallazza al 85^

Atri resultac de chësc fin dl'edema:

Altherren (La Val): La Val – Albeins  2-3

U-15 (La Val-Mareo) : La Val – Teis/Funes  1-1

U-12 (La Val) = La Val – Fußballzentrum Pustertal 5-1

U-11 (La Val) = La Val – Alta Badia 0-5