5ª partida campionat 2013/14
In sabeda ai 28 de Setëmber él gnü sughé la cuinta partida dl campionat 2013/2014 de 3ª categoria por La Val. La partida é gnüda sugada fora de ćiasa sön le ciamp da Raas cuntra la scuadra dl post.
Na partida che sön le papier ne parô nia ria, mo sciöche an à bele plü iadi udü, vëgn chëstes partides combatüdes cina ala fin y al é tres rî portè a ćiasa na devënta. La scuadra da La Val fej bela figüra y se prejënta sön le ćiamp dl Raas cun gran umilté y respet dla scuadra aversara y cun gran orentè era buna de porté i trëi punc a ćiasa.
Bel da mëter man é la scuadra da La Val che fej n gran pressing y tëgn la scuadra alta, i centroćampisc abina n grüm de pai de cé y i atacanć tëgn le pal alt y röia gonot dan porta aversara.
Le gol por La Val toma bele do da 15 menüć, le defensur Marco C. va jö por la fascia y se tira ite cuntra porta, so cross bas ti röia avisa sön le pé al aversar che le deviëia insciö te porta. Püch dedo éle ince Alex E. che à na gran ocajiun, al ciafa le pal amesa area sön n bel preparativ de Emanuel, mo le tiro röia de tröp sura porta fora.
Le jüch da La Val, por menè i atacanć a contlujiun, se basëia tröp sön le apogè le pal zeruch y spo de le lancè a scavalché le mür defensiv, a chirì les döes punte Emanuel y Micky che é bugn de gestì bun le pal. Ci che fala ciamò é le ultim pasaje che ne röia prësc mai a bun fin. Dan che le arbiter sciüra le prüm temp éle ciamo Micky che vëgn lancé da na pert jö, mo imped puntè cuntra porta, tolel la dezijiun de purvè le tiro, mo chësc röia de püch sura la stangia de porta fora.
La scuadra da Raas ne é düt le pröm temp nia cis prigorusc, al é scialdi La Val che detëia i ritmi y se tëgn insciö la partida tles mans.
Le prüm tëmp se stlüj jö sön le resultat de 1 a 0 por La Val.
Le secundo tëmp mët man y i sogadusc da La Val sà bel avisa che ai mëss a düc i cosć stlü jö la partida, deache sciöche al é bele conesciü, sce an splundra sön porta aversara sënza ester bugn de fa balè la rëi, suzedl gunot le contrario y an se ciafa le gol cuntra.
Le assedio da pert dla scuadra da La Val va inant, les püces ripartenze da pert dl Raas vëgn scialdi tignides sö dai defensurs da La Val. De vigni sort de ocajiuns à i atacanc da La Val tl secundo tëmp, üna de chëstes é Dorigo che ciafa. Sön n bel passaje de Romeo él bun de jí sù cuntra porta, mo da bat ler portier ne éle chësc iade nia bun, le tiro röia sura porta fora.
La scuadra da La Val les prô dötes mo ara stënta dassënn da segné le secundo gol y insciö crësc ince la nervosité. Te ćiamp éle n gran marcé y i sogadusc s' nen scraia sö tra d vëi. Le Raas mët ince man de sughé y röia plö iadi a contlujiun, sënza ester però bugn de bat le portier Sepl. A calmè i cês é spo Alex A. y Paolo che pënsa, ai cumana sü cumpagns a nia perd la luzidité y de restè conzentrà inant.
Insciö tomel spo le gol dl 2 a 0, al 75˄ éle Manuel Stampfer, apëna gnü cambié fora, che ti scinca a Micky n assist d'or, le atacant pò ji su cuntra la porta y cun n tiro bas éle bun de segnè.
Tartan i ultimi menüć é spo la scuadra da La Val che se piazzëia bun te ćiamp a defëne le resultat.
La partida se stlüsc jö sön le 2 a 0 por La Val. Cun chisc punć davagná se porta La Val al 3° post te tlassifica cun 10 punć.
Proscima partida é l'andata dl secundo turno de Copa Provinzia che gnarà sugada in mercui ai 02.10.2013 dales 20:00 a Vahrn cuntra la scuadra da Neustift.
La formaziun titolara: Kantioler Sepl, Valentin Elmar, Alton Alex, Vallazza Paolo, Castlunger Marco, Elzenbaumer Alex, Sottara Stefan, Rubatscher Romeo, Miribung Alexander, Frenes Micky, Dorigo Emanuel
Sostituziuns:
Werner Sottara por Alexander Miribung
Manuel Stampfer por Emanuel Dorigo
Egon Frenes por Marco Castlunger
Adrian Miribung por Alex Elzenbaumer
Felix Nagler por Micky Frenes
Por udëi i resultać de chësta dumënia de campionat drüca: risultati.pdf
