Tröc é stà i spetadus rovà adalerch a La Val L'ultim fin dl'edema por le derby ladin, gnü sughé danter la formaziun de ćiasa y chëra dla Val Badia. I trëi punć resta in chësc iade a La Val deperpo che i aversars mëss sun jì a mans ötes.
Na partida a chëra che intrames les scuadres se confortâ bele da tröp tëmp. Do da bun trëi agn s’à les döes formaziuns indo incuntè por se mosoré, in chësc iade a La Val. Le publich é sënzater gnü recompensè cun en derby plajor, rich de jüch y de beles aziuns da trames les perts. Le gran nervus, prësc três presënt te partides tan sintides, ne s’à in chësc iade nia lascè odëi plü cotan. La devënta é tlera por La Val, che mët bun trëi iadi le palê te porta aversara.
Da trames perts ne él nia stè tëmp assà da se studié jö, la defenjiun da La Val impara bel atira dal mëteman a cunësc i atacanć aversars, che se fej prigorusc dan limit dl’area. Al somëia che le jüch sides tles mans dla Val Badia canche le atacant da La Val Emanuel respogn al gran druch cun le pröm gol: sön le ciantun dl’area de straufunga driblëia chësc dui defensurs, al se fej lerch y cun na trata bassa inaspetada sön le pé lunch de porta portel le vantaje por La Val. Dal atra pert é atira dedô Matthias S. che vëgn sorvì da Romeo C. cun na bela passaja filtranta söl fì de forajüch, por en pulan ne abina nia le atacant le palê, che röia tles mans al verdaporta Sepl. Püch do é ćiamò Romeo al limit dl’area co pro de trà sön porta, le defensur da La Val Marco röia indere a dërt’ora a deloj le palê te ciantun.
Sciöche tl pröm tëmp toma le secundo gol atira do püć menüć tla secunda fraziun, plö avisa al 50^. Le trù dl gol é in chësc iade Alex E. che se chir, al mët in dificoltè le defensur cun n bun control de piet, la trata a bot sigü sön le pé lunch i porta le radopl dl resultat a La Val. Al ne resta nia tröp tëmp por festejé, che bel do 6 menüć pò Alex indo esulté sön n sò gran gol. L’intenziun de Alex é stada de arlungé la cogura a Michi mo sön la crossada sön la crossada tôl le palê n’atra direziun: al momënt dla trata é le verdaporta Luca Massa destaché dala linea de porta, insciö ne röia chësc nia te porta a dërt’ora a tignì sö le lunch palonët, che röia sot la stangia ite. Gran ligrëza y esultaziun por la doplëta de Alex.
Do le 3 a 0 devënta le jüch de ćiasa plötosc defensif, La Val Badia pò insciö avanzè y röia ince a contlujiun. Le atacant Romeo à sëgn na gran ocajiun sön sò pé, sön na rebatüda dla defenjiun se presentëia le medem a püć metri da porta mo splundra le palê sura fora. A porvè de stlü definitivamënter la partida é le jonn Marco S. da La Val che manacia: Sön n bel assist de Emanuel vëgn le śogadù a mezćiamp menè sù dan Massa, le bel palonët al jore ti fej indere le pulan al pé de porta.
A detè i ritmi de jüch ti ultims menüć é dessigü la Val Badia, al ti garêta de beles combinaziuns y aziuns, mo le mür defensif é ćiamò bun cun les ultims forzes y dezijiun de tignì bot. A Alex Felder ti gareta prësc le gol dla bandira, cun n bel stach de će abinel le palê crossè amez mo la cogora passa bel plan dlungia porta ia. Dan la fin é ćiamò Emanuel che vëgn desgort dal arbiter por soma de amoniziuns, le verdaporta da La Val Sepl mëss inće ti lascè le post a Julian, a gauja de n contrast cun l’atacant Prada.
I önesc de Floriani se salva impò le vantaje cina la fin, che ó ince dì salvé le pröm post de tlassamënt.
La Val - Val Badia: 3 - 0
Formaziun titolara: Sepl Kantioler, Elmar Valentin, Marco Castlunger, Paolo Vallazza, Egon Frenes, Max Nagler, Stefan Sottara, Marco Sottara, Alex Elzenbaumer, Micky Frenes y Emanuel Dorigo.
Alenadù: Floriani Claudio
Sostituziuns:
Adrian Miribung gnü ite impede Michi Frenes (70^ menüt)
Felix Nagler gnü ite impede Alex Elzenbaumer (75^ menüt)
Martin Ploner gnü ite impede Egon Frenes (80^ menüt)
Manuel Stampfer gnü ite impede Marco Sottara (80^ menüt)
Julian Moling gnü ite impede Sepl Kantiolera (85^ menüt)
Por odëi i resultac dles atres partides drüca RESULTAĆ