7ª partida de campionat - Derby ladin

Chësc ultim fin dl'edema él gnü soghé le tan aspeté derby ladin anter la formaziun da La Val y chëra dla Val Badia.

Soghé éle gnü al ciamp Pradel a San Martin, olache ince chësc secundo derby i va a La Val, le resultat toma fora sön le 2 a 1. Na partida iüsta, sides por le resultat final y sides por la direziun arbitrala.

Le bel publich apascioné rové adalerch á podü ciaré a na bela partida, cun en prüm tëmp scialdi comané da La Val, deperpo che la VB fej le jüch tla secunda pert.

Atira é La Val co mët sot a presciun la defenjiun dla VB, la formaziun se posizionëia plö alta por fa druch sön i portadus dl palé. Michi vëgn tosc metü a tera al limit y ciafa la puniziun, la bela trata tl'incrujiada vëgn desfantada cun n bel stach dl numer un Fredigg. Püch do, al 8^ vëgn Alex E. sorví da Stefan y bel sú dan le portier prol la trata sëcia sön le pröm pé che ti gareta por le 1 a 0. I pai rebatüds dala defenjiun dla VB vëgn scialdi archità sö, cun le antizip ti gareta a La Val val ripartënza, le ultim pasaje chilò dess ester fondamental, gonot indere él massa lunch o massa cört, le portier Ferdigg fej bun só laur y blochëia tröc pai passà amez. Dal atra pert é le capitan Erlacher che pro ince na puniziun al limit, la trata de prezijiun vëgn deviada te ciantun cun n bel jore dl verdaporta Sepl. Al 40^ se prejentëia le atacant Alex E. dan porta y vëgn metü a tera dan la trata dal portier Ferdigg, le arbiter mostra sön le punt di önescmetri che vëgn trasformé da Michi por le 2 a 0.

Le pröm temp se röia sön le resultat de 2 a 0 por La Val

Tla secunda pert dla partida passa le sceter dl jüch ala VB, i atacanc da La Val vëiga dainré la porta aversara y mëss plö gonot aretré a dëidé defënn. Le mür defensiv tëgn bot y ne lascia nia passé saurí i atacanc dla VB. Ocajiun d'or di padruns de ciasa é le jonn Hannes che á sön le pé, sön na rebatüda de Sepl röia chësc ultim a porvé la trata sëcia, le curan röia indere sura la stangia de porta fora. Le gran druch porta ince sü früc y al 86^ röia le atacant Manuel da na pert jö y mët n bel palé amez por le compagn Alla che pó apogé insciö la cogura te porta. Ince sce les forzes di ghesc é prësc a tera, ne mancel impó nia la determinaziun de porté a ciasa i trëi punc. Al vëgn combatü sön vigni palé y les sostituziuns frësches da ince só contribut a fa garaté la devënta. Cun le sciür dl arbiter se röia chësc secundo derby y i ghesc da La Val pó trá le scrai tan aspeté. La Val resta al terzo post cun le distach de 2 punc dal Sest, la VB romagn al otavo post.

ACD Val Badia – La Val : 1-2

Formaziun La Val: 1.Sepl Kantioler, 2.Elmar Valentin, 3.Egon Frenes (dal 70^ Werner Sottara), 4.Paolo Vallazza, 5.Marco Castlunger, 6.Freddy Sottara, 7.Luca Pescollderung (dal 50^ Felix Nagler), 8.Stefan Sottara - capitan, 9.Michi Frenes (dal 85^ Adrian Miribung), 10.Alex Elzenbaumer, 11.Max Nagler (dal 70^ Alexander Miribung).

Formaziun Val Badia: 1.Rene Ferdigg, 2.Andrea Conrater (dal 56^ Altin Alla), 3.Julian Bernardi, 4.Alex Stampfer (dal 83^ Hannes Erlacher), 5.Samuel Vittur, 6.Davide Moling (dal 74^ Matteo Ploner), 7.Heinrich Conrater (dal 66^ Daniel Crepaz), 8.Giovanni Giaramita (dal 46^ Paolo Adami), 9.Manuel Clara, 10.Armin Erlacher (capitan), 11.Matthias Stampfer.

Goi La Val: Alex Elzenbaumer al 8^, Michi Frenes 40^

Goi Val Badia: Altin Alla al 86^

Proscimes partides: La Val süga süa proscima partida in domenia ai 3 de má dales 16:00 a La Val cuntra le Mühlwald deperdpo che la VB süga dala indema ora a Gais cuntra la scuadra de ciasa