Campionac taliagn de lüsa alta - Diego campiun

Sensaziun ai campionac taliagn de lüsa alta, Diego Tschaffert da La Val é le plö asvelt y fej süa la medaia d’or.

Lijun – I campionac taliagn é uramai n apuntamënt tradizional dl sport dla lüsa alta. In chësc ultim fin dl’edema s’á presenté i atlec ia en Lijun sön la pista “Petschied”, preparada cun atenziun por l’ocajiun. I ladins se mostra stersc portan a ciasa de bí resultac, mo la sensaziun dl fin dl’edema é dessigü le prüm post dl’atlet da La Val Diego Tschaffert, che s’á presenté al start do na lungia palsa y á mostré düta süa bravüra. Al mostra sö le miú tëmp dla sabeda (1.07,22) y le terzo miú dla domënia (1.06’03) restan insciö a ciaval tla tlassifica por soma de tëmps di dui dis.

Na bela sodesfaziun pó se tó l’atleta da Lungiarü Nagler Luisa, ruvan a pié do la medaia de arjënt tla categoria juniores (2’22.45). Tla medema posiziun se concuistëia ince Shamira Brunner da La Val tla categoria senior cun le tëmp de 2’17.32. Cun le tëmp de 2’18.11 se archita Ploner Alex al bun 5. post tla categoria Juniores.

Stersc ince i mituns che pó mostré sö chisc plazamenc: aliefs (mitans) – 5. Peccei Lara, 6.Miribung Elena, 7. Campei Miriam – aliefs (mituns) – 3. Moling Matthias, 4. Brunner Philipp, 7. Alton Elias. 9. Ties Michael – ragazzi (mituns) – 4. Campei Fabian, 7. Frenes Max, 8. Crepaz Davide.

I medemi mituns sará impegnà in chesc fin dl’edema a Latsch por la finala dles gares joniles Raiffeisen, deperpo che i atri atlec palsa por la finala de Copa de Südtirol, che gnarà tignida ai prüms de merz sön la pista Do Juvel a Lungiarü.