Latzfons- L’ultim fin dl’edma, ai 18 y ai 19 él gnü tignì la i campionać taliagn de liösa alta dla sajun. A se musuré por le titul nazional s’al prejentè 123 atleć de 17 uniuns al start.

 

 

 

Le fin dl’edma é stè scialdi caraterisé dal burt tëmp, la sabeda da temperatöres plötosc cialdines y plöia. Le secundo dé, la domënia, é la temperatöra jüda zeruch y à insciö dlacè la pista por la finala. Le gran laûr di organisadûs y la buna condiziun dla pista à impò garantì na competiziun regulara.

Le pröm dé é le vizecampiun talian da l’ann da denant Diego Tschaffert dl’U.S. La Val che fej le miù tëmp, cun 1/100 secunć de vantaje sön l’atlet Roman Kaser da Lijun. La domënia è spo l’atlet Florian Schölzhorn dal Jaufental co se lascia düc i atri do les sciables. Diego mëss in chësc iade se “acontentè” dl cuarto miù tëmp, dô Kaser y Stockner. Te süa categoria röia Diego al secundo post do le medemo Florian.

Miribung Carlo arjunj le pröm plazamënt tla categoria master B cun le tëmp de 1’13.70.

Alton Anton arjunj le pröm plazamënt tla categoria master B1 cun le tëmp de 1’15.10.

Novité è ince stè le secundo plazamënt pro le doppl, le DUO Tschaffert Diego/Moling Manuel arjunj le tëmp de 1’17.97 dô i frêdesc Lambacher.

A gauja de motifs de stüdi ne s’à la campionëssa taliana da in l’ann passè Daniela Erlacher nia prejentè al start. Le post lëde é gnü concuisté dala campionëssa mondiala Theresa Hilpold.

 

Le bel y bun fin dl'edma se stlüj ćiamò jö cun na bela devënta. Le 2º plazamënt pro la tlassifica dles scuadres và ala scuadra dla lüsa da La Val!

 

Por i resultać di campionać taliagn a Latzfons: risultati

Por deplö informaziuns, por ci che reverda resultać, novitês y le program dla lüsa pon vijité la plata internet sot a chësc linch: http://www.sportrodel.it/

 

Te chësc fin dl’edema, ai 25 de Jenà se mosöra i atleć jogn pro les “Raiffeisenjugendrennen” sön la Saiseralm. Ai pröms de furà gnaral spo tignì la pröma gara de Südtirolcup 2015.

 

 

Foto: Dropbox