Na prestaziun ejemplara chëra mostrada le mercui sëra te Copa Provinzia cuntra le Raas. La Val pita n bel jüch y se mostra de n livel plö alt co le Raas. Le resultat de 2-0 é dessigü mirité.

La partida a ritm alt pëia ia cun i ladins al’atach. Le druch vëgn bel premié al 10^ menüt, Max Nagler vëiga bun le cumpagn Adrian che se smarchëia dant, al prô de sorví l’ atacant cun n palê alt che ti röia avisa sön le pé. Le medemo Adrian controlëia y vega la trata sëcia te porta por le vantaje. Atira do le gol vëgn le 9 dl Raas sorví amez area por la trata al jore che ti röia indere tles mans al verdaporta Julian. La Val respogn cun n pressing alt, al 30^ fej le mezciamp pié ia le jonn Michele C. cun na passaja filtranta, al condüj le curan cuntra porta y prô a püc metri la trata de ciamp che röia indere dlungia porta ia. Le jüch dominé dai ladins vëgn tosc archité dal arbiter por la fin dl prüm tëmp.

Le pröm tëmp se stlüj sön le vantaje de 1 a 0 por La Val.

Dala determinaziun di sogadus pon capí che un en gol ne basta nia te chësta sëra. Alex E.se prejentëia ala puniziun tl piz dl’area dl Raas. La trata a bót sigü indirizada sön le pröm pé, passa de n nia dlungia ia. Le jüch dl Raas ne se sblochëia nia dl düt y i ladins le tëgn zeruch cun na gran presciun. Le radopl dl resultat röia spo al 65^ cun Adrian. Le cumpagn Alex se fej lerch da na pert jö y mët le palê bass amez por Adrian, chësc ultim vëgn antizipé dal portier mo le curan ti sciampa fora dles mans, por Adrian ne él nia rî apogé le palê te rëi. La doplëta dl’atacant, che á bel segné l’ultima de campionat, porta plö segurté ai ladins. Le Raas se fej ciamó prigorus ti ultims menüc. Sön na crossada röia l’atacant a rebat de ce cuntra le pé de porta. Do chësta tramurada sciüra le arbiter la fin dla partida. N bel resultat che pó gní aduré a vantaje di ladins por la partida de retüda ai 14 de novëmber tl biotop a Raas.

La Val – Raas: 2-0

Formaziun La Val: 1. Julian Moling, 2. Luca Pescollderung, 3. Marco Castlunger - capitan, 4. Paolo Vallazza, 5. Egon Frenes, 6. Freddy Sottara,7. Alex Elzenbaumer, 8. Max Nagler, 9. Adrian Miribung (dal 75^ Marco Sottara), 10. Franz Tolpeit, 11. Michele Campei (dal 75^ Christian Dapoz)

Goi por La Val: Adrian Miribung al 10^ y al 65^

Proscima partida: In sabeda ai 03 de otober dales 15:30 a San Iöre cuntra la scuadra dl San Iöre Junior

Atri resultac de Copa Provinzia: (rode C)

30.09.2015 - Sexten - SEXTEN - PRETTAU  4:0
30.09.2015 - Niederdorf - NIEDERDORF - VAL BADIA  3:1
30.09.2015 - Wengen - LA VAL - RAAS 2:0