Les morvëies de Sepl Kantioler y n bel laur de scuadra porta ince La Val tla secunda categoria dl palé amatorial.

Y ince la scuadra da La Val sará da da d’altonn tla secunda categoria. Le mercui sëra ai 7 de jügn él gnü a s’ dé a Bornech na partida de dezijiun sëcia. La Val (secunda tl rode C) se mosorâ cuntra Lijun (secunda tl rode B). I ladins á arjunt na gran devënta, cun dezijiun che toma pormó do 120 menüc de jüch y do la lotaria ai önescmetri. N sogadú che se mirita na noziun a pert é bëgn le portier da La Val Sepl Kantioler, che á chësta sëra fat morvëies. Bele tratan la partida ti ál paré ai aversars na trata dai önescmetri y le rest ál fat ales trates finales, olache al ti an á ciamó n iade paré trëi. Insciö n’án gnanca albü bria da porté a fin les trates, deache la devënta por La Val ê sigüda, cun le resultat final de 4 a 1.
A confront le Lijun cun le miú atach de düc i trëi rodi cun bëgn 84 goi segnà y la formaziun da La Val cun la secunda miú defenjiun ti medemi rodi
I jun daimpró ia cun i avenimënc dla partida. I ladins desmostra bele ti pröms menüc na gran determinaziun te ciamp. I aversars da Lijun stënta a se ciafé y subësc cotan de aziuns d'atach. Ala cherd' ora la pröma ocajiun: la trata de puniziun dal limit de Stefan, indirizada söl pe bas de porta, vëgn desfantada tl'ultim dal verdaporta aversar. Cun le jì jö dl sorëdl y na miú odüda é ince le Lijun che mët man a costruì val' aziun interessanta. Do avëi davagné na trata dal ciantun al 25^ se roda l'atacant Gruber cun velozité te area y pro la trata cuntra porta, tignida sö indere da Sepl. Püch do vëgn le palé rebatü dala defenjiun ladina y Grünfelder röia a dërt momënt a fa pié ia na trata a bót sigü cuntra porta, ince chësc iade ti dij le un da La Val de no al vijin da Lijun. La Val ciafa indo coraje y pro danü süa fortüna. Chësc iade él Franz che vëgn sorvì cun na bela passaja dal mezciamp, al é bun a recuperé cun la piza dl pe le palé y le fej cogoré sön le pe lunch de porta. Le portier se destira y deloj por püch le curan te ciantun. I vijins da Lijun se fej ciamó prigorusc sön val' trata standard, mo se stënta ales concretisé. Le pröm tëmp se röia cun gran tenjiun te ciamp y i aplaus de incorajamënt da pert dl publich.

Le pröm tëmp se stlüj jö sön le 0-0

Les bunes intenziuns portades te ciamp dai ladins tla secunda pert vëgn bel do püc menüc sofoiades da n önescmetri conzedü dal mandl fosch a gauja de n contrast cun le capitan dl Lijun su dan porta ladina. L' arbiter ne pordona nia le fal de Christian y ti mostra atira la cherta cöcena. Le sogadú Senoner se presentëia sigü sön le punt dla mascima puniziun,  le portier Sepl fej chiló le pröm miraco dla sëra, al se destira y tegn sö te n secundo momënt la trata sëcia. En sëgn por La Val, che ti da nöia speranza y forza, ince sce ma in diesc te ciamp. Al ne passa tröp che la cosciënza dl arbiter ti fej tra fora dal tacuin la secunda ghela por na finta tomada de n sogadú aversar. Le sogadú desgort por dopla amoniziun avaliëia insciö le numer te ciamp. Impó é le Lijun co tëgn le sceter dl jüch tles mans, i ladins mëss aretré a defënn cun i pröms granfs ales giames che se fej sintí. Cun patimënt suradöt da pert di ladins y cun degönes contlujiuns concretes dl Lijun a chirì le vantaje, se röia tosc i tëmps regolamentars. La pala ti öga a trames les formaziuns por tra le flé, scassé fora les giames y se preparé mentalmënter ai tëmps suplementars. I trënta menüc porta a püch, les scuadres se stënta dassënn a imposté le jüch y porta insciö a ocajiuns debles y nia prigoroses. Ti ultims menüc mord ciamó la defenjiun da La Val cuntra le sterch atach da Lijun aspetan ma plö le sciüre dla fin.

Le ultim vare por detlaré le campiun é chël dles trates dai önescmetri. I sogadus sfinis racöi les ultims forzes por se prejenté cun le pe frëm dan porta aversara y dan le gran publich ezitënt. A daurí la lotaria di önescmetri é le sogadú Kaser dl Lijun. Cun segurté tra i pa ne ti conzed Sepl nia chësta sodesfaziun, paran la trata cun n gran stach. Ala prüma trata por La Val se presentëia le capitan Stefan y la trasformëia a bót sigü. Sepl à na buna intuiziun sön la trata de Oberhauser y para ince chësta. Inant é le jonn Michele che mët le palé a tera y ti oj le spiné al portier pian sbunf por trasformé cun prezijiun la secunda trata por La Val. La terza trata dl Lijun vëgn deviada de püch cun la piza di dëic te rëi. Le palé dl proscim önescmetri por La Val é sigü, al é le tiradú Felix che cun le pe frëm mët le palé te sach. A se ciarié la responsabilité dla trata dezisiva por I aversars é le capitan Kaneider. Chiló ti gareta a Sepl le cuarto miraco dla sëra. Al chir fora la dërta pert dla direziun dl palé y se destira cuntra le pe de porta paran ince chësta trata.
Cun chësta prestaziun ejemplara y cun só gran mirit vëgn Sepl prësc sofoié dai cumpagns de scuadra che pó tra n scrai de ligrëza y lascé jö n bel pëis. Cun chësta devënta ti gareta a La Val le salt de categoria do bëgn diesc agn. Por chësc travert arjunt ti va sambëgn en gran complimёnt al alenadù Hilber Gerhard, ai sogadus y ala dirigёnza dl’U.S. La Val por döt l’impëgn y la dediziun ala scuadra. Ai sostenidus che inće gnüs rovà a Burnech a incorajé la scuadra en gran giulan. La Val scri storia por l’uniun y se alza te 2a categoria.

Lijun – La Val 1-3 (0-0 do i tëmps reglamentars)

Formaziun La Val: 1. Josef Kantioler, 2. Luca Pescollderung, 3. Werner Sottara (dal 70^ Alexander Miribung), 4. Paolo Vallazza, 5. Marco Castlunger, 6. Christian Dapoz, 7. Marco Sottara (dal 91^ Michele Campei), 8. Max Nagler (dal 100^ Felix Nagler), 9. Samuel Winkler (dal 80^ Adrian Miribung), 10. Stefan Sottara - capitan, 11. Franz Tolpeit

Goi por La Val (önescmetri): 1. Stefan Sottara, 2. Michele Campei, 3. Felix Nagler