6ª partida de campionat rit.- Vandoies

Stampa

foto_scuadra

Le Vandoies castighëia te püch tëmp y remuntëia ala fin le dopl vantaje ladin.





Na desfata dala saú antia, chëra che La Val á msé subì cuntra i aversars dl Vandoies. Do ester stá imbatüs te ciasa da sedesc fins dl’edema incà, ti archita chisc le primat cun na bela leziun. Sön le dopl vantaje vëiga i ladins fosch y vëgn spetà sot dal Vandoies, che castighëia ti ultims menüc fajan scassé la rëi bëgn trëi iadi.

Jun daimpró ia cun i avenimënc plö interessanc dla partida. Sot en sorëdl lorënt toma le gol por La Val bel ti prüms menüc de jüch: al 7^ ciafa Michele le palé al limit y fej pié ia na trata de potënza che fej balé la rëi. Le portier ne röia nia a desfanté la trata lungia sön le prüm pé de porta. Plö inant é le Vandoies che fej druch, dlungia val ocajiuns d’or arjumades, ince en gol anulé por posiziun de forajüch. Al 25^ pëia ia na trata dal ciantun por La Val, Michele a dërt’ora röia a rebat le palé te porta che vëgn indere tignì sö adinfal dal cumpagn atacant.

I ladins stënta cotan a marché l’aversar che anuzëia la deblëza por rové tres plö dlungia porta. Impó tëgn chisc le vantaje cina la fin dl pröm tëmp.


Le prüm tëmp se stlüj jö cun le vantaje dl La Val por 1 a 0.


Dal punt d’odüda dl jüch, é la secunda pert plö ecuilibrada, cina le 74^, daulache al ti gareta le dopl vantaje al La Val: Werner S. crossëia amez por Samuel W. che rebat le palé de ce dlungia le pé de porta ite. Püch plö de trëi menüc plö tert se oj la partida completamënter. Al 77^ röia en palé alt de püch daít dal’area, le sorëdl ingianëia l’odüda dl defensur che abina zënza orëi le palé cun la man. L’arbiter ne sighita nia y mostra sön le punt di önescmetri, daulache le sterch Mirabella trasformëia la trata. Le Vandoies cun süa determinaziun ti fej tramuré les giames ai ladins y sciafia de avalié le resultat al 81^. L’atacant recuperëia le palé sön la linea dl ciantun y le fej rové al limit daulache le compagn tira a bót sigü cuntra porta; le palé rebatü naota cuntra la stangia y spo sön la linea blancia de porta vëgn te n secundo mumënt apogé dal’atacant Leitner cun le ce te rëi. Nia da crëie por i sogadus ladins che á ma plö püc menüc por mët a post la partida. Nianca le tëmp da stlarí i pinsiers che i aversars castighëia por le terzo iade. Al’ultim menüt de jüch vëgn a se de n cajin dan porta ladina, le palé ti sciampa fora dles mans al portier y l’atacant passa amez por Oberhuber al mumënt sú dan porta, al basta apogé te porta por le vantaje. L’arbiter sciüra püch do la fin, i ladins ciamó inciurnies á udü sciöche le Vandoies ti à tut te püc menüc i trëi punc fora de gaiofa. Chësc é le jüch dl palé, daulache vigne picera dijatenziun pó ester dezisiva por l’andamënt dla partida. Por la formaziun de ciasa dessigü na leziun!

 

La Val – Vandoies : 2 - 3


Formaziun La Val: 1. Sepl Kantioler, 2. Egon Frenes, 3. Werner Sottara, 4. Paolo Vallazza, 5. Christian Dapoz, 6. Michele Campei (dal 70^ Miribung Adrian), 7. Max Nagler (dal 80^ Martin Ploner), 8. Franz Tolpeit, 9. Alexander Miribung (dal 65^ Christian Terza), 10. Stefan Sottara – capitan, 11. Alex Elzenbaumer (dal 30^ Samuel Winkler)

Goi por La Val: Michele Campei al 7^ y Samuel Winkler al 74^

 

Proscima partida: La Val süga en dumënia dales 16:00 a Rasen cuntra la scuadra de ciasa


Atri resultac:


Juniores Pool (Mareo/La Val/Rina): Mareo – Natz  0-4

Altherren (La Val): La Val – Falzes  0-2

U-12 (La Val): La Val – Pro Team 1-4

U-9 (La Val): La Val – Obopuschtra Pumas 2-2