6ª partida de campionat - Dietenheim

Stampa

La_Val_Rina

Le Dietenheim desdlacia le resultat purmó amesa le secundo tëmp, do che le La Val ti tëgn bót por gran pert dla partida.






En aversar sterch chël dl Dietenheim, che mët bel dal mëteman dla partida sot a presciun la formaziun ladina. Tla prüma cherd’ora mëss i padruns de ciasa se paré cun mans y pîsc cuntra l’atach aversar, süa miú erma é les situaziuns standard, sön chëres che ai é dassënn prigorusc. I sogadús da La Val indere tëgn bót al prüm asediamënt y se lascia tosc udëi te ciamp. Do i vint menüc se ecuilibrëia la partida y ince i ladins á süa ocajiun, sön na rebatüda resta le palé sön le limit de area, Stefan tira cun forza cuntra porta, indere de püch sura fora. Al 30^ röia dal’atra pert na bela crossada dal ciantun, l’atacant salta a dërt tëmp por rebat cun le ce te porta ladina, la reaziun de Nathan é ejemplara, al se destira a se apié le curan, che ti resta tles mans. Val trata aversara röia ciamó cuntra porta de ciasa, mo indî nia prigorosa.

Ince tla secunda pert romagn le jüch a mezciamp, ecuilibré da tramres perts. La paziënza devënta tres mëindra y tramres formaziuns ó desdlacé le resultat por prüms. Chësc ti gareta indere daimprüma ai aversars da Dietenheim cun en gran gol al 65^. Ala trata dal ciantun se presenteia le sogadú Lechner che tira a giré diretamënter cuntra porta: le numer un Nathan pro ciamó da se destrá, mo le palé röia de püch sot l’incrujiada de porta. A respogn al vantaje aversar é i ladins, che injunta en sogadú ofensif ala formaziun, a sostëgn dl’atach. Ai pro de avanzé cun palés basc y rischiëia ince cotan. Na puniziun da buna posiziun salta ciamó fora, daulache la trata vëgn delota te ciantun cun la man, fat indere nia odü dal mandl fosch. Insciö anuzëia ince le Dietenheim le mumënt por jí in cuntrapé, le sogadú Tripodi röia dan le portier, ciafa na bela crossada y tira lunch cuntra porta, segnan en bel gol che ti taia spo les giames al La Val.

Na pordüda antia: le La Val á tigní bót cina i ultims vint menüc, canche le gol sön standard á condizioné l’andamënt dla partida. La vöia de davagné y la determinaziun an indere odü, chësta é da porté inant tles proscimes partides de campionat!


La Val – Dietenheim   0-2


Formaziun La Val: 1. Nathan Massa, 2. Natan Colletta (dal 77^ Marco Miribung), 3.Denis Erlacher (dal 77^ Alex Rubatscher), 4. Christian Terza, 5. Paolo Vallazza, 6. Philip Moling, 7. Alex Ploner, 8. Stefan Sottara – capitan, 9. Martin Ploner, 10. Alex Elzenbaumer, 11. Andreas Campei (dal 56^ Mattia Mutschlechner)


Proscima partida: La Val in duman sabeda dales 15:00 te ciasa cuntra le Raas