7ª partida de campionat - Raas

Stampa

La_Val_RinaLe La Val castighëia a dovëi le Raas, mo mëss asuié cina la fin por mëte al sigü la devënta.







Le La Val y le Raas, al mumënt posizioná tla pert bassa dla tlassifica, s’á confronté l’ultim fin dl’edema a La Val. Tramres formaziuns ó porté a ciasa i trëi punc por se destaché y avanzé de posiziun. Na partida rica de ocajiun y emozionanta cina la fin: i ladins á indere la miú y se mët insciö i trëi punc te gaiofa.

Sciöche bele scrit danfora, les ocajiuns te chësta partida é stades cotantes; bele do diesc menüc dal mëteman anulëia l‘arbiter en gol di ladins por posiziun de forajüch, daldöt nia iustifiché. Püch do al 15‘ en pice spavënt: le palé vëgn rebatü cun le pé dan defensur dl La Val cuntra la stangia de porta ladina. Atira dedô él indere l’atach dl Raas che fej tramoré la porta cun na trata tres cuntra la stangia.
Impurmó ala mesora sblochëia la formaziun de ciasa le resultat. Sön na trata de puniziun dal limit röia Alex Rubatscher sön la rebatüda dl portier a trá sëch te porta, segnan insciö só prüm gol cun la maliëta dl La Val. Le vantaje ti fej coraje ai padruns de ciasa, che davagna al 40‘ na trata dai önescmetri por n contrast dl portier sön Alex P.. Ala trata se presentëia Alan Erlacher che trasformëia cun segurté la mascima puniziun.
Le radopl ne tëgn nia dî, dui menüc dedo sön na dejatenziun dla defenjiun driblëia l‘atacant dl Raas y tira cun prezijiun sön le pé lunch de porta. Alex R. á ciamó fan da goi y insciö püch dan le prüm tëmp sön na trata ladina cuntra porta se presentëia indo l‘atacant sú dan le verdaporta, le curan ti sciampa fora dles mans y Alex ne sighita nia a le splundré te rëi por le 3 a 1.

I ladins s‘á avisa de messëi segné ciamó por mëte al sigü le resultat. Ai tôl sö les racomandaziuns dl‘alenadú Costabiei y combinëia bun l‘aziun por fa ruvé te area Alex E., chësc controlëia a dovëi y tira lunch a giré te porta. Al ne passa diesc menüc che Martin P. se fej lerch da na pert  ite y passa amez por l‘atacant Mattia, che apogëia cun bravüra indo le palé te porta. Le gran vantaje ladin por 5 a 1 porta ai sogadús de se lascé do fora, gran fal indere, che ti costa te püc menüc bëgn dui goi. Trami sön de gran dijatenziuns, le portier Sepl mëss ince se destrá plö iadi por evité le peso. Andreas C. manacia spo de segné al 75’, do che al vëgn sorví amez, prôl la trata a incrujé che ne ti gareta indere nia. A püc menüc dala fin fej ciamó Stefan tramuré la porta dl Raas cun na puniziun dai vintecinch metri. Cun le sciür dla fin se röia indere la partida, le mandl fosch mëss se aldí les protestes di aversars do na direziun daldöt nia al‘altëza. Sce an ciara l‘andamënt dla partida ess le resultat podü salté fora ciamó plö pesoch por i ladins. Cuntënc de avëi porté a ciasa la devënta, ciara la scuadra bele ala proscima partida cuntra le Percha.

La Val – Raas   5-3

Formaziun La Val: 1. Sepl Kantioler, 2. Natan Colletta (dal 46^ Martin Ploner), 3. Simon Campei, 4. Denis Erlacher, 5. Paolo Vallazza, 6. Christian Terza, 7. Alex Ploner (dal 68^ Marco Miribung), 8. Stefan Sottara – capitan, 9. Alex Rubatscher (dal 70^ Andreas Campei), 10. Alex Elzenbaumer, 11. Philip Moling (dal 60^ Mattia Mutschlechner)

 

Goi por La Val: Alex Rubatscher al 30’ y 45’, Alan Erlacher al 40’, Alex Elzenbaumer al  54’, Mattia Mutschlechner al 64’

Proscima partida: La Val in duman sabeda dales 15:30 a Percha cuntra la scuadra de ciasa