5ª partida de campionat rit. - Dietenheim

Stampa

La_Val_Rina

I ghesc da La Val mëss s’acontenté cun en punt, ince sce cun en pügn de determinaziun y fortüna in plö fossel garaté na devënta.




 

 

I ladins á afronté le Dietenheim sön le ciamp dl Percha, a gauja dla sozieté aversara che é tl laur de renové le ciamp dal palé. La formaziun de Costabiei s’á preparé tratan l’edma ala partida, ciaran de desmuntié la desfata cuntra le Neustift dl’fin dl’edema denant. Te ciamp él gnü porté na buna ciaria de determinaziun, che á mancé tl’ultim tëmp. Ai aversars él gnü lascé pücia lerch da sughé y plö gunot á i ghesc manacé de jí in vantaje, ince sce al é tres rî de concretisé les ocajiuns che se prejenteia.

Bele dal mëteman röia i sogadus conzentrá te ciamp, ai fej na buna presciun y davagna cotan de palés, che vëgn ince anuzá a dovëi por costruí de beles aziuns. Al é indere le ciamp che ne pormët nia de finalisé l’aziun: i badioc é ausá a sughé tröp sön le sintetich y se stënta a dosé la forza ti passaji. Chësc á porté plö iadi a sbalié l’ultim passaje dan ruvé te porta a contlujiun. Al 15^ na gran ocajiun por Luca B. che ti sciampa da na pert ite cuntra porta y pro na trata sëcia; le un dl Dietenheim é chiló reatif y desfantëia la trata te ciantun. Le jüch dl prüm tëmp se limitëia tl mezciamp dl Dietenheim, cun i ladins che pro de jí in vantaje. Al 40^ pro ciamó Alex E. na trata bassa te porta, che vëgn por püch deviada te ciantun.

La secunda pert mët man atira cun i aversars al comane y al 65^ ti garetel spo de sbloché le resultat cun en gol de ce sön trata dal ciantun. Chësta ocajiun concretisada, üna dles püces dl Dietenheim, ti da na dërta scassada ala formaziun ladina, che pro danü de tó la partida dles mans. A ti mët le bastun tles iames é ince le mandl fosch, che se fej influenzé dai scrai di aversars y sciüra tröp cuntra i ghesc. Al 78^ driblëia Christian T. la defenjiun mo vëgn contrasté püch daite dal’area di önescmetri, l’arbiter mostra sön le punt dla mascima puniziun. Philip Moling se presentëia sigü ala trata y la trasformëia ince tl 1 a 1. Al é ciamó val menüc de partida da soghé y i ladins avanzëia de tröp por chirí le vantaje: al 88^ röia ciamó Martin P. sú dan porta ala trata, le portier fej en miraco y se destira a desfanté le curan demez. Le sciür dl’arbiter fej indere ruvé püch do la partida y i sogadus se salüda insciö cun en punt porom te gaiofa.


Dietenheim – La Val 1-1


Formaziun La Val: 1. Sepl Kantioler, 2. Natan Colletta (dal 45^ Marco Miribung), 3.Alex Ploner, 4. Simon Campei, 5. Max Nagler, 6. Felix Nagler (dal 65^ Christian Terza), 7. Luca Bernardi (dal 65^ Alex Rubatscher), 8. Stefan Sottara – capitan, 9. Mattia Mutschlechner (dal 75^ Martin Ploner), 10. Alex Elzenbaumer, 11. Alex Miribung (dal 73^ Philip Moling)

Gol por La Val: Philip Moling al 78^


Proscima partida: La Val süga in duman sabeda dales 16:00 a Raas cuntra la scuadra de ciasa



Atri resultac de chësc fin dl'edema:


U-15: Steinegg - Val Badia 8-3

U-13: La Val – San Laurenz 3-5

U-11: Rasen/Antholz – La Val 3-1

U-9: La Val – Vintl brüm 2-1

I sogadús da La Val mostra na bela prestaziun cuntra i prüms de tlassifica. La fortüna ne é indere nia dala pert di ladins, che ti da para i trëi punc dla devënta.